Foreword

Foreword: Doctrine According to Godliness
Written by Ronald Hanko
Translated into Urdu by Pastor Arslan Ul Haq
Translated and used by permission of the Reformed Free Publishing Association
Copyright © 2018. All rights reserved.

No part of this text may be reproduced, stored in a retrieval system, distributed to other web locations for retrieval, published in other media, mirrored at other sites, or transmitted in any form or by any means—for example, electronic—without the prior written permission from the publishers.

Reformed Free Publishing Association
1894 Georgetown Center Drive
Jenison, MI 49428
https://www.rfpa.org

تعلیم بہ مطابق دِین داری

مصنف: رونالڈ ہینکو  

ترجمہ کار: ارسلان الحق

پیش لفظ

مسیحی رسالت کے کام میں ایک بڑی ذمہ داری یہ ہوتی ہے کہ خدا کے کلام اور انجیل کو واضح اور سادہ انداز میں پیش کیا جائے اور بائبل مقدس کی تعلیمات کو پوری طرح مگر مختصر طور پر بیان کیا جائے۔ ہم ایسے دور میں جی رہے ہیں جس میں بہت سے لوگ مسیحی ہونے کا اقرار تو کرتے ہیں لیکن بائبل مقدس کی تعلیمات سے ناواقف ہیں اور الجھن کا شکار ہیں اور گمراہ کرنے والی ہر ایک تعلیم کے جھوکے سے موجوں کی طرح اچھلتے بہتے پھرتے ہیں۔ وہ ایمان جو ایک ہی بار مقدسوں کو سونپا گیا تھا وہ اُس کی بنیادی باتیں بھول چکے ہیں جنکا انہیں علم ہونا چاہیےتھا۔ دورِ حاضرہ میں رسالت کا کام کرنے والے خادم کا کام صرف یہ نہیں کہ صرف مسیحیوں کی رہنمائی کرے بلکہ ان لوگوں تک بھی پیغام پہنچائے جو مسیح کو نہیں جانتے اور جنہوں نے کبھی حقیقی انجیل نہیں سنی۔ اُس کا کام ظاہری طور پر مسیحی کہلانے والوں کو ایمان سے متعلق رہنمائی کرنا اور غیر ایمانداروں کو توبہ اور مسیح پر ایمان لانے کی خوشخبری سنانا ہے۔

ایسے دور میں جس میں لوگوں میں معیاری مواد کے مطالعے کا رجحان کم ہو جائے اور وہ زیادہ دیر تک اپنی توجہ برقرار نہ رکھ سکیں تو ایسے حالات ایک پاسبان یا رسالت کا کام کرنے والے خادم کے لیے کام کو اور بھی زیادہ مشکل بنا دیتے ہیں۔ ایسا مواد تلاش کرنا مشکل ہے جو تعلیم کے لحاظ سے مضبوط ہو، ان مشکلات کا حل بھی ہو اور واقعی مفید بھی ہو۔ 1940ء کی دہائی میں پادری ہرمن ہوکسما نے اپنے ریڈیو پیغامات میں مختصر مگر مؤثر وعظ پیش کئے جن میں سے کچھ بعد میں کتابی صورت میں شائع ہوئے۔ ان کی کتاب فضل کا معجزہ اس کی ایک بہترین مثال ہے۔ ایک اور کتاب، پادری رونالڈ ہینکو اور پادری رونالڈ کیمنگا کی تصنیف فضل سے نجات، نے خدا کی حاکمیت اور بادشاہت کو اور کالوینیت کے پانچ نکات کو بائبل مقدس کی روشنی میں مفصل طور پر بیان کیا ہے۔

کتاب ہذا تعلیم بہ مطابق دین داری بھی انہی کوششوں کا تسلسل ہے جو تعلیم کو آسان انداز میں سمجھانے کے لیے لکھی گئی ہیں۔ پادری ہینکو کی یہ کتاب رسالت کے میدان میں کی گئی محنت کا نتیجہ ہے۔ انہوں نے اس کتاب کے زیادہ تر مضامین کئی برسوں میں تیار کیے جب وہ شمالی آئرلینڈ میں مشنری پاسبان تھے جہاں ایک ایسا دور بھی تھا جس میں پریسبیٹیرین کلیسیاؤں میں اصلاحی ایمان بہت مضبوط تھا۔

اِس کتاب کے ہر مضمون کی خوبی یہ ہے کہ وہ مختصر ہونے کے باوجود مکمل ہے۔ ہر مضمون ایک بنیادی عقیدہ یا تعلیم کو سادہ اور بامعنی انداز میں بیان کرتا ہے۔ ساتھ ساتھ مصنف نے ان مضامین کو اس طرح ترتیب دیا ہے کہ کہ پوری کتاب اصلاحی ایمان کا مکمل خاکہ پیش کرتی ہے۔ اسی لیے یہ کتاب ایک طرف تو مختصر سوالات کے جواب دینے کے لیے مفید ہے اور دوسری طرف مضامین کی ترتیب اصلاحی عقائد کے تسلسل کے مطابق ہے جس کی وجہ سے یہ مجموعہ ایک مکمل تعلیمی کتاب یا اصلاحی عقیدہ کے بنیادی نصاب کے طور پر بھی استعمال ہو سکتا ہے۔

یہ طریقہ کار مواد کو نہ صرف اصلاحی رسالتی کام کے لیے موزوں بناتا ہے بلکہ قائم شدہ جماعتوں یا مسیحی تعلیم میں مطالعہ اور بحث کے لیے بھی مفید ہے۔ پوری کتاب گروہی مطالعہ یا مباحثے کے مواد کے طور پر استعمال کی جا سکتی ہے اور انفرادی مضامین کو الگ الگ بھی استعمال کیا جا سکتا ہے۔ جو لوگ مختلف حیثیتوں میں تعلیم دینے کے لیے مقرر کیے گئے ہیں، چاہے وہ بزرگ ہوں، والدین، اساتذہ، یا بائبل سوسائٹی کے رہنما، انہیں یہاں عقیدہ اور تعلیم کے لحاظ سے مضبوط اور مفید مواد ملے گا جو اُن کی تیاری میں مددگار ثابت ہوگا۔

ان مضامین کا مطالعہ مسیحی ایمانداروں کو اس قابل بنائےگا کہ وہ دوسروں کو اپنے اندر موجود امید کا جواب دینے کیلئے تیار رہ سکیں۔ جو شخص عقائد کی بھاری بھر کم کتب کو بوجھ محسوس کرتا ہے، اس کے لیے یہ کتاب اصلاحی عقائد کے وسیع دائرے کو ایسے انداز میں بیان کرتی ہے جو قاری کو بائبل مقدس اور مزید مطالعہ کی طرف لے جاتا ہے۔

ہر مضمون کو ایک یا دو صفحات تک محدود رکھنا مگر ساتھ ہی اسے جامع اور مکمل میں رکھنا ایک مشکل کام ہے۔ یہ کوئی معمولی بات نہیں کہ ریورنڈ ہینکو نے اسے اتنے مؤثر طریقے سے انجام دیا ہے۔ مصنف نے مسیحی زندگی اور طرز عمل پر سچائی کا اطلاق کر کے اس کتاب کو صرف معلوماتی نہیں بلکہ ایک فائدہ مند روحانی مطالعہ بھی بنا دیا ہے۔اور ایمان اور عمل، عقیدہ اور زندگی، سچائی اور اس کے عملی اطلاق کو خوبصورتی سے یکجا کر کے پیش کیا ہے جس کے نتیجے میں یہ مضامین نہ صرف تعلیمی طور پر رہنمائی کرنے میں مددگار ہیں بلکہ دین داری کی زندگی بسر کرنے کے لیے تربیت بھی فراہم کرتے ہیں۔ اس طرح کتاب کا عنوان واقعی اپنے مضمون کے مطابق اور نہایت موزوں ہے۔

خدا کرے کہ یہ کتاب جو اُس کے خادم کی محنتوں کا ثمر ہے، اپنی بادشاہی کے فروغ اور جلال کے لئے کثرت سے استعمال کرتا رہے۔

پادری تھامس میرزما

---